In de NWZ lees ik, dat dree Lehrlü ut Ollnborg mehr Kolonialgeschicht in uns Teemuseen un bi de Vermarktung van uns Teekultur sehn willen. Ik heff mi eerst maal ’n Koppke Tee maakt. Mit Tee vör de Nös kann ik beter nadenken.

Een Saak is klaar: De Geschicht van de Teehandel is neet blot ’n mooi Vertellsel van Seilschepen un fiene Tassen. Daar hören ok Utbeutung, Gewalt un koloniale Herrskupp to. Dat mutt vertellt worden. Daar gifft dat nix an to rütteln.

Man uns oostfreeske Teekultur is mehr as de Handelsweg van ’n dröögt Teebladd. Wenn wi tosamen sitten, Tee drinken, proten un uns Tied för anner Lü nehmen, denn is dat uns Kultur. Wenn ik mien Gast ’n Koppke Tee inschenk, denn segg ik dormit: „Sett di daal. Du büst willkomen.“ Ik segg neet: „Ik finn de britske Kolonialpolitik van vör 200 Jahren heel moi.“

Un wenn wi över Utbeutung proten, denn interessert mi vör allen Dingen, wo dat vandage utsücht: Könen de Lü, de uns Tee anbauen un plücken, van hör Arbeid leven? Waar kummt uns Tee her? Un wat kriegen de Lü för hör Arbeid? Daar will ik van de Teefirmen klare Antwoorden hebben. ’n Moi Bild up de Packung langt mi neet.

Man nu heff ik noch ’n Fraag an de Lehrlü ut Ollnborg.

Vandage word an Universitäten ja geern daaröver proot, well över well proten dürt, well to Woord kummt un well wat sülvst beleevt hett.

Denn mutt Fokko doch fragen: Sünd de dree egentlich Teedrinkers?

Ik weet dat neet. Villicht drinken se elke Dag hör dree Koppkes. Man wenn dat Koffjedrinkers sünd, denn sitten daar villicht dree Lü mit ’n Koffjetass vör de Nös un verklaren uns Oostfresen, wo wi över uns egen Teekultur denken sallen.

Denn will ik dat Prinzip ok heel konsequent anwennen: Dürt ’n Koffjedrinker dat överhoopt? Of mutt he neet eerst maal dree Koppkes drinken, ehr he mitproten dürt?

Ik meen ja blot.

De koloniale Geschicht höört up Disk. De Lü, de uns Tee vandage anbauen, ok. Man uns egen Geschicht un uns Teetied hören daar nettso hen.

Erfolgreiche Teetied in Waterende.Ein geselliger Nachmittag mit typisch ostfriesischsen Spezialitäten mit einem Schlagerquiz zur Unterhaltung. Die nächste Teetied wird im Dezember stattfinden.