Klook proten is good – genau proten is beter

Dat mit de Zeitung is so’n Saak. Wi köönt ja all gern mol över „de Medien“ schimpen, wenn uns wat nich passt. Man wenn mörgens de Zeitung up’n Disk liggt, denn leest wi se doch. Wi willt ja weten, wat los is. In Ollnborg, in Berlin, in de Welt. Un denn mutt dat ok stimmen. Nich bloot ungefähr, nich so van wegen „passt woll“, sünnern richtig.

Nu harr Fokko dor so’n politischen Kommentar leest. Dor gung dat um Kubicki un sien bekannte Aart.

Dor stunn sinngemäß, Kubicki harr Merz „Eierarsch“ un Lauterbach „Spacken“ nöömt. Dat klingt bannig kräftig. Dat leest sik fix. Dat maakt wat her. Man ganz so eenfach weer dat eben nich. Bi Merz harr he seggt, he harr dat dacht. Un bi Lauterbach wies he dorup hen, wat Lüüd in sien Stammkneipe över hum seggen würden. Dat is natürelk Juristerei up dünn Ies. Man just dor speelt Kubicki ja mit. Dat is sien Trick: dicht an de Kant langs, man nich unbedingt över de Kant röver.

Un denn is dat för Zeitungslüüd eben wichtig, heel genau to proten. Besünners wenn se sülvst mit Naam un Bild dorbi stahn. Dat is ja egentlich good. Man weet denn: De dor hett dat schreven. Dat schafft Vertraun. Man Vertrauen is as’n Porzellanteller. De mutt nich glieks in Stücken fallen. Aver wenn dor eerst’n Sprung in is, denn kiekt man bi’n nächsten Mal anners hen.

Fokko seggt dat nich, wiel he keen Zeitung mehr lesen will. Ganz in’t Gegendeel. Wi bruukt Zeitungen. Wi bruukt Lüüd, de fragen, sorteren, kontrolleren un ok mol den Finger in de Wunn leggen. Man wenn de Presse vun Genauigkeit leevt, denn mutt se ok genau sien, wenn’t unbequem, spits oder lustig warrt.

Anners denkt de Leser bi de nächste Analyse: Is dat nu sauber maakt? Oder weer dat ok bloots ungefähr richtig?

Un „ungefähr richtig“ kann bi’n Wetterbericht viellicht noch dörchgahn. Bi Politik, Presse un Vertraun aver nich.